Díli, yokalaumedia.com (25/10/2023) – Ninive Auxiliadora Sequeira hanesan feto potensial ida husi suku Mascarenhas, Postu Vera-Cruz Munísipiu Díli, konsege hahotu nia estudu lisensiatura iha Universidade Díli (UNDIL), ne’ebe hakarak mos kandidata-an atu kompete iha eleisaun suku, nu’udar Líder suku Mascarenhas tanba lakohi atu lakon oportunidade hodi apoia sidadaun suku refere iha prosesu dezenvolvimentu ida ne’ebe ativu no integradu.

Hela de’it minutu balun, Timor-Leste sei marka tan istória ida ne’ebe fo biban ba sidadaun sira atu hili sira nia komando hodi akopaña sira ba hakbesik liu tan ba roman ukun-an nian durante tinan 7 (2023 to’o 2030).

Ninive Auxiliadora Sequeira deside-an hodi kompete ho kandidatura sira seluk tanba hakarak tebes sai mata-dalan ba komunidade ida kreativu, inovativu hodi nune’e minimiza problema sosial sira iha suku Mascarenhas.

“baze fundamentu ne’ebé mak enkoraja ha’u hodi kompete ho kandidatu sira seluk, tanba ha’u hakarak tebes lori dezenvolvimentu mai iha Suku no Aldeia sira iha ne’e, no espesifiku liu hakarak sai mata-dalan ba komunidade ida kreativu, inovativu hodi nune’e minimiza problema sosial iha Suku Mascarenhas, atu nune’e iha dame no paz, ha’u mai ho objetivu ha’u hela ho ha’u nia prinsipiu no ha’u hakarak fila ho ha’u nia rezultadu”, hateten Ninive

Kandidatura ne’e mos akresenta tan katak, atu sai lideransa, la’os uza forsa fiziku no postura fiziku, maibé nia iha para sai lian ba komunidade sira nian, hodi aprezenta nia problema sir aba mahukun nain sira.

“ha’u hanesan feto foinsa’e ida, ha’u mos lakoi lakon oportunidade iha festa demokrasia ne’e, tanba lei igualdade generu mos fó dalan ba feto atu kompete iha área saida de’it, nune’e ha’u hakarak hatudu no hateten de’it katak, feto jerasaun foun mos iha espiritu no kbi’it atu bele lidera! Fíziku no tinan la sai hanesan bareira no ha’u senti feto mos bele lidera, naran katak kakutak mak tenki kro’at no la’o tu’ir duni misaun ne’ebé iha, atu nune’e lori komunidade ses husi futuru ida ne’ebe nakukun”, fortifika Nia.

Lisensiada UNDIL ne’e promote kria oportunidade ba joven sira no halo parseiru dezenvolvimentu ho NGO, agensi internasiona no Instituisaun relevante sira bainhira hetan konfiansa husi povu Mascarenhas.

“Karik ha’u hetan konfiansa husi povu Mascarenhas, prontu defende lia-los no aspirasaun komunidade iha baze, hamutuk hodi hari’I kondisaun apropriadu no integradu tuir ambiente ne’ebé suku ne’e iha, kria oportunidade ba joven sira, hodi hasa’e sira nia skill (koñesimentu) no halo parseiru dezenvolvimentu sira ho NGO, agensia internasional no instituisaun sira hodi bele hasa’e kapasitasaun rekursus humanus”, promete Auxiliadora.

Ninive mos husu ba sidadaun sira komporta di’ak liu tan iha eleisaun komunitária ne’e.

“Ha’u nia mensagem ba povu tomak Timor-Leste, espesial liu ba suku ne’ebé hau pretense ba, katak direitu no demokrasia ba ita bo’ot sira atu hili, maibé ha’u dehan hili lideransa uza ita bo’ot sira nia matenek mak fihir hodi fó votu ne’ebe iha valor bo’ot tebes no votus ne’ebé maka imi fó maka determina imi nia moris ida ativu ka la ativu ba iha prosesu tomak durante tinan hitu nia laran”, Hameno Ninive.

Iha prosesu eleisaun suku ida agora hahoris vontade sidadaun ida bo’ot tanba jovem mos hahu nadodon ba kompete iha momentu refere nune’e bele sai matan, ibun, fuan no lalatak ba nia emar sira.

Reportagem: Cedelizio do Rêgo

 15,313 Tatal Lee,  2 Views Today