Bobonaro-Lontas, yokalaumedia.com (05/12/2023) Sekretáriu estadu komunikasaun sosiál (SEKOMS) inaugura sentru informasaun suku iha Munisipiu Bobonaru, postu Lolotoe suku Lontas.

Sekretáriu estadu komunikasaun sosiál (SEKomS) Expedito Dias Ximenes esplika katak ezistensia sentru informasaun suku ne’e atu hsakbesik liu asesu informasaun ba komunidade, espesialmente foinsa’e iha Lontas.

“ha’u mai reprezenta IX governu konstitusionál hodi inaugura sentru informasaun suku,  ne’ebe VIII governu hanaran “naroman ba Suku”, katak fatin ida ne’ebé atu halibur jovem, estudante no inan-aman sira atu bele hatene dezemvolvimentu iha baze, Nasionál no mos iha mundu liu husi informasaun tanba Governu ida ne’e lori mos rede Internet mai iha suku, liuhusi programa ida ne’e estudo no jovem sira bele mai uza rede ida ne’e hodi asesu informasaun iha Nasionál no mos internasionál sira”, esplika Expedito.

Ex-Jornalista ne’e mos afirma katak governu sei hakas aan  apoia media sira hodi divulga informasaun ba komunidade sira ho di’ak.

“tamba ne’e IX governu konstitusionál nia programa durante tinan lima nia laran sei tau atensaun makas  hodi lori informasaun ba komunidade sira liu husi sentru informasaun suku. programa ida seluk mak governu sei fortifika ita nia radiu komunidade sira. Tamba radiu komunidade sira mak liña frente ba informasaun iha suku “front line” no radiu komunidade ne’e komunidade sira mk hari hodi servi komunidade no lori informasaun ba kumunidade”, afirma Governante.

Iha fatin hanesan koordenador sentru informasaun suku, Aires Maria, senti kontenti ho ezistensia sentru informasaun suku ida ne’e iha Lonas.

“ha’u senti kontenti no deseju tebes ba prosesu inaugurasaun ida ne’e tmba liuhusi meius ida ne’e bele fasilita komunidade sira iha suku Lontas hodi asesu informasaun iha railaran no mos iha rai liur, tanba ekipamentu iha ona maibe ami edifísiu mak seidauk iha nune’e ami husu ba governu atu estabelese tan edifísiu hodi ami bele hala’o servisu ne’e ho di’ak no  ami mo’s hakarak husu atu fasilita  ami iha parte kapasitasaun nian hodi tulun ami no komunidade sira tamba media mak reprezenta lian ba lian-laek”, husu Aires.

Hatan ba kestaun ne’e, Sekretáriu estadu komunikasaun sosiál (SEKOMS), Expedito Dias Ximenes hateten katak governu sei buka dalan hodi kria espasu ida ketak ba iha sentru informasaun suku.

Membru governu ne’e mos husu ba joven sira hodi aproveita ho didi’ak hodi prepara sira nia aan.

“ha’u husu ba joven sira katak, se jovem mak futuru nasaun nian, maka jovem tenki prepara aan tamba nasaun presija ita bo’ot sira nia kontribuisaun, uluk, agora no ba oin”, Husu Expedito.

Tuir observasaun katak komunidade suku Lontas ho kontente simu SEKOMS ho ekipa.

Reagem: Joanito Rangel.

 580 Tatal Lee,  1 Views Today