Dili-yokalaumedia.com (4/3/2023), Presidente Partidu Demokrátiku Repúblika de Timor-Leste (PDRT-Sigla Português) Agostinho Gomes hateten konferensia nasional ne’e hala’o hodi prepara ba eleisaun parlamentar ne’ebe tuir kalendariu sei monu iha loron 21 fulan Maio tinan ne’e.

“Ami hala’o konferensia nasional ne’e ami garante katak ami sei liu iha eleisaun parlamentar”, hateten presidente PDRT, Agostinho Gomes, iha salaun CNE, Sábadu.

Presidente ne’e haktuir katak sira nia simpatizante ho militante iha baze metin, no hatudu katak iha eleisaun presidencial tinan kotuk sira nia masa hamutuk treze mill duzentos, iha ne’ebe balun ba apoio Presidente da Repúblika José Ramos Horta no Eis Jeneral Lere Anan Timur, no agora sira mai hamutuk fali hotu ona iha PDRT no sei garante katak haksoit liu iha bareira, sublinha Agostinho

“Ami fiar katak ami sei hetan kadeira 4 ou 5 iha parlamentu”, Presidente PDRT deklara.

Se bainhira liu iha parlamentu nasional iha ami nia mandatu sei hare liu ba dezempregu no koperativa. tamba iha ita nia rain taxa dezempregu sae maka’as tebes no joven barak mak ba servisu iha rai liur sira toba tuir de’it iha estrada ibun hanesan iha portugal.

“Ami nia programa no planu spesifiku rua ne’e, ne’ebe mak sei realiza iha ami nia mandatu ne’e ami koalia saida mak ami halo tiha ona no saida mak ami koalia agora ami sei realiza”, tenik nia.

Militantes ho apoiantes sira ne’ebe partisipa iha konferensia ne’e mai husi municipio ho orgaun nasional sira mais ou menos hamutuk atus ida resin.

Reportagem : Eva Ximenes

 235 Tatal Lee,  1 Views Today