Dili-yokalaumedia.com (26/03/2023)- Militante 244 husi partidu Frente Revolusionário Timor-Leste Independente (FRETILIN), Partidu Klibur Haburas Unidade Nasionál Timor Oan (KHUNTO) no Partidu Os Verdes de Timor, afilia ba partidu Congresu nasionál Rekonstrusaun Timorense (CNRT) ho fiar ida atu lori partidu ne’ebe lidera husi Xanana Gusmão fila ba ukun iha 2023-2028.

Afiliadu husi FRETILIN, Carlos Pereira, hateten militante husi partidu tolu ne’e mai husi suku Becora, Camea, no Ai Lok, hamutuk atus rua hat nulu resin Hat (244) mak halo afiliasaun ba partidu CNRT tamba partidu refere iha vizaun ne’ebe luan tebes ba nia rai no povu.

“Ami afilia mai partidu ne’e ami nia hakarak rasik no lasignifika partidu tolu ne’e ladiak no CNRT mak diak liu, maibe bainhira ami fo votu sira lidera latau konsiderasaun ba ami”, nia hateten iha konsolidasaun ne’ebe realiza iha Sabraka-Laran, Aldei Mota Ulun, Suku Becora, Díli, Domingu, (26/03).

Alende ne’e, razaun seluk ne’ebe fundamenta sira nia afiliasaun mak CNRT nu’udar Partidu ida ne’ebe iha vizaun di’ak hodi dada Kadoras mai Timor, define soberania Estadu husi fronteira rai maran, tasi no lalehan entre nasaun Indonezía ho Austrália no hadia Sistema servisu iha instituisionál sira, no argumenta liu tan katak ba CNRT atu bele lori hikas Xanana ba ukun durante tinan lima mai.

Afiliadu hirak ne’e simu direta no fo hatais atributu partidu nian husi Presidente partidu CNRT, Kay Rala Xanana Gusmão, inklui mos estrutura Nasionál husi organizasaun polítika ne’e.

Iha diskursu, líder Karizmátiku ne’e hateten partidu CNRT la iha intensaun atu sobu partidu seluk, maibe hanesan organizasaun polítika presija organiza an no konsolida an hodi partisipa iha eleisaun ne’e.

”Ohin ami hamrik la kontete ho hanoin ida ne’e dehan CNRT sobu dadauk partidu seluk, ami kontente tanba, hanesan ohin Akay ko’alia katak sira hanoin, tetu, sukat no deside hodi mai haforsa CNRT, ne’e ami kontente tebes”, hateten Xanana.

Prezidente CNRT ne’e mos la aceita atu lori nia ba Primeiru-Ministru maibe oinsa atu kumpri responsabilidade ne’ebe fo husi povu atu tane, servi no desenvolve rai Timor. Xanana mos apresia konfiansa ne’ebe husi Povu ba CNRT no kompromete atu la repete erru sira ne’ebe partidu komete hanesan koligasaun pre-eleitoral sira.

Reportagem : Eva Ximenes

 267 Tatal Lee,  1 Views Today