Díli-yokalaumedia.com (11/05/2023)- Komisaun Nasionál Eleisaun sei organiza debate partidu politiku 17 ne’ebe sei koopera ho Rádiu Televizaun Timor-Leste (RTTL,EP) hodi fo biban ba líder partidu polítiku sira atu fa’an programa ba eleitor sira molok hakat ba realizasaun eleisaun iha loron 21 maiu.

Durante enkontru tekniku ne’ebe hala’o salaun Laline Larigutu CNE, Presidente Komisaun Nasional Eleisaun (CNE-Sigla Portugez), Jose Agostinho Belo hateten sorumutu ne’e atu fo hatene lala’ok no preparasaun sira ba reprezentante partidu sira atu bele koopera bainhira debate ne’e realiza.

“Ami apela katak debate ne’e la’os Timor oan deit mak asiste, maibe ema hotu inklui mos observador Internasional, tan ne’e husu ba líder parpol sira atu mai fo hanoin ne’ebe diak ho kampana ida ne’e ajuda mos ita nia eleitor hodi determina sira nia votu ba partidu ida”, hateten presidente CNE, iha salaun Laline Larigutu, Kuinta-feira, (11/05).

Iha sorumutu refere mos reprezentante husi Partidu sira fo hanoin atu hasa’e tan durasaun debate nune’e sira bele diskute ho kle’an konaba programa sira.

Debate ne’e sei responsabiliza husi CNE, konaba kestaun konteudu sira, no RTTL.EP, konaba kestaun téknika sira no sei realiza husi loron 16 to’o 18 maiu ne’e.

Partidu politiku hamutuk 17 ne’e sei fahe ba loron tolu, loron primeiru 16 maio ne’e husi numeru sorteu 1-9 no loron segundu 17 maio ne’e husi numeru sorteu 10-17, no loron terseiru partidu 17 hamutuk dala ida hodi realiza debate.

Partidu politiku 17 ne’e sei hasoru malu iha loron 18 maio, debate ho imperativu, akorda no diskorda ho argumentu atu nune eleitor sira bele deside atu fo sira nia votus.

 “ami hakarak oferese programa ne’ebe diak no util ba ita nia partidu sira hodi fahe sira nia programa atu eleitor sira mos bele koñese no hatene lolos partidu ida ne’ebe mak sira bele depozita fiar ba”, esplika Belo.

Reportagem : Eva Ximenes

 1,504 Tatal Lee,  1 Views Today